Daventar in manaschi d'emprendissadi
Premissas e pretensiuns
Sco manaschi d'emprendissadi giugais Vus ina rolla decisiva en la furmaziun professiunala. Vus pussibilitais a las giuvenilas ed als giuvenils da rimnar durant lur scolaziun experientschas praticas en lur professiun tschernida. Quest engaschi n'è betg mo in'investiziun en l'avegnir da Vossa branscha, mabain porscha era blers avantatgs per Vossa interpresa.
Pass impurtants sin via al manaschi d'emprendissadi:
S'infurmar: As infurmai davart las pretensiuns e las obligaziuns d'in manaschi d'emprendissadi.
Tscherner in:a furmatur:a professiunal:a: Tscherni in:a u plir:as furmatur:as professiunal:as en il manaschi che surpiglian la responsabladad per la scolaziun.
As preparai: Endrizzai Voss manaschi tenor las pretensiuns da la scolaziun.
Inoltrai ina dumonda: dumandai ina permissiun da furmaziun da l'uffizi per la furmaziun professiunala responsabel per vegnir renconuschì sco manaschi d'emprendissadi .
Recrutar emprendist:as: Recrutai candidat:as adattad:as per Vossas plazzas d'emprendissadi.
Scolar: Accumpagnai, sustegnai e giuditgai las emprendistas ed ils emprendists durant lur scolaziun.
I vala la paina da daventar in manaschi d'emprendissadi, ma i dovra la prontezza da s'engaschar ed ina planisaziun premurusa. L'investiziun en la scolaziun da persunas qualifitgadas giuvnas porscha numerus avantatgs per Voss'interpresa e la societad en sia totalitad.
ILS AVANTATGS D'IN MANASCHI D'EMPRENDISSADI
Sco manaschi d'emprendissadi procurais Vus ad uras per forzas da lavur qualifitgadas, giudais in avantatg finanzial, profitais da las pli novas tendenzas ed innovaziuns da las emprendistas e dals emprendists e rinforzais l'image da Voss'interpresa.
LAS OBLIGAZIUNS D'IN MANASCHI D'EMPRENDISSADI
Vus avais la responsabladad da porscher ina scolaziun d'auta qualitad che correspunda a las pretensiuns legalas e pedagogicas. Quai vul dir crear in plan da scolaziun, porscher pussaivladads d'emprender e promover il svilup da las emprendistas e dals emprendists.
Cuminanza da manaschis d'emprendissadi
La cuminanza da manaschis d'emprendissadi è ina furma d'organisaziun particulara da la furmaziun fundamentala professiunala. Dus u plirs manaschis cun activitads cumplementaras sa reuneschan ad ina cuminanza da manaschis d'emprendissadi e scoleschan cuminaivlamain emprendist:as. La finamira da questa collavuraziun è d'intermediar a las persunas ch'emprendan ina scolaziun confurma a l'ordinaziun, profitond da las resursas cuminaivlas, e d'optimar uschia ils sforzs da scolaziun dals singuls manaschis.
Uschia pon er ils manaschis spezialisads sa participar a la furmaziun fundamentala professiunala.
Ulteriuras infurmaziuns chattais Vus qua
