Documentar e valitar
Il rapport da furmaziun e la documentaziun d’emprender
En la furmaziun fundamentala professiunala èn la documentaziun e la valitaziun fitg impurtantas per segirar e meglierar il success d’emprender dals giuvenils. Il rapport da furmaziun e la documentaziun d’emprender èn instruments centrals per cuntanscher questa finamira.
La Lescha federala davart la furmaziun professiunala (LFPr) e l’ordinaziun respectiva accentueschan l’impurtanza d’ina documentaziun e valitaziun sistematica durant il process da scolaziun. Las furmaturas ed ils furmaturs èn obligads d’evaluar e da documentar regularmain il stadi da furmaziun da las emprendistas e dals emprendists. Quai fan els en emprima lingia cun agid dal rapport da furmaziun ed a basa da la documentaziun d’emprender.
Il rapport da furmaziun
La LFPr prescriva en l’artitgel 20 che las persunas responsablas dals manaschis d’emprendissadi hajan da s’engaschar per il meglier success pussaivel da las emprendistas e dals emprendists e da survegliar quest success periodicamain. Tenor l’ordinaziun davart la furmaziun professiunala ha la furmatura u il furmatur da documentar il stadi da furmaziun da la persuna ch’emprenda e da discutar quel cun la persuna almain ina giada per semester. L’instrument per far quai è il rapport da furmaziun. Igl è damai obligatoric d’emplenir il rapport da furmaziun.
I dat differentas furmas da rapports da furmaziun. Ina pussaivladad è per exempel da duvrar ina varianta dal formular per ils discurs da qualificaziun cun las collavuraturas ed ils collavuraturs. Singulas organisaziuns dal mund da lavur mettan a disposiziun formulars da valitaziun specifics per la professiun cun cuntegns respectivs. Il Center svizzer da servetschs per la furmaziun professiunala, cussegliaziun da professiun, da studi e da carriera CSCP ha sviluppà il formular neutral „rapport da furmaziun“. I sa tracta d’in instrument adattà als basegns specifics da l’emprendissadi en in manaschi che las furmaturas ed ils furmaturs pon surpigliar.
Guid per in rapport da furmaziun orientà a las cumpetenzas d’agir
- Rapport furmaziun: formular interactiv [PDF, 618.31 KB]
- Training report: explanations [PDF, 411.47 KB]
- Training report – Sample Example (In German) [PDF, 137.62 KB]
Ina gruppa da lavur cun represchentant:as dals chantuns, da la Scola auta federala per la furmaziun professiunala, dal Secretariat da stadi per furmaziun, retschertga ed innovaziun e dal CSCP ha creà in guid per in rapport da furmaziun che sa basa sin las cumpetenzas d’agir. Quest document serva sco agid ad organisaziuns professiunalas ubain a singuls manaschis che scrivan agens rapports da furmaziun. Per in rapport da furmaziun ideal tenor l’alinea 7 da l’ordinaziun davart la furmaziun duessan ils aspects, las valitaziuns ed ils elements da text dal guid vegnir resguardads.
- Anleitung für einen handlungskompetenzorientierten Bildungsbericht [PDF, 107.57 KB]
GLISTA DA CONTROLLA: SCRIVER IN RAPPORT DA FURMAZIUN
- Preparar bain il discurs ch’è la basa per il rapport da furmaziun: dus videos explicativs As dattan tips nizzaivels:
- Nudar cleramain las cumpetenzas ed il stadi da furmaziun.
- Integrar e discutar la documentaziun d’emprender.
- Tematisar las prestaziuns en la scola professiunala ed en ils curs intermanaschials.
- Permetter a la persuna ch’emprenda da valitar sia furmaziun.
- Definir e nudar las finamiras communablas per il proxim semester.
Documentaziun da la furmaziun fundamentala professiunala
La gronda part da las ordinaziuns davart la furmaziun prescrivan ina documentaziun d’emprender. Co che quella vegn realisada po variar d’ina professiun a l’autra. Intginas organisaziuns dal mund da lavur han sviluppà atgnas documentaziuns d’emprender a basa da las particularitads da la furmaziun professiunala correspundenta. Per tut las autras ha il CSCP edì in instrument da lavur neutral "Documentaziun da la furmaziun fundamentala professiunala".
En questa documentaziun d’emprender nodan las emprendistas ed ils emprendists lur process d’emprender en furma da rapports. Ellas documenteschan a moda uschè detagliada sco pussaivel tut las lavurs, abilitads ed experientschas essenzialas en il manaschi d’emprendissadi. La documentaziun serva uschia sco ovra da referenza per l’entir temp da l’emprendissadi. En intginas professiuns po la documentaziun d’emprender vegnir duvrada sco med d’agid per l’examen final. Quai è reglà en las ordinaziuns davart la furmaziun respectivas.
La documentaziun d’emprender permetta a las furmaturas ed als furmaturs da vesair l’andament da la furmaziun, l’interess per la professiun e l’engaschi persunal da la persuna ch’emprenda. Ellas ed els ston controllar regularmain la documentaziun d’emprender, la suttascriver e discutar en detagl cun l’emprendista u l’emprendist, e quai il pli tard, cura ch’i sa tracta d’emplenir il rapport da furmaziun.
La documentaziun d’emprender neutrala, edida dal CSCP, consista dals suandants elements:
- carnet "Guid per la documentaziun d’emprender"
- ordinatur cun in register
- bloc da formulars per ils rapports d’emprender
L’entira documentaziun d’emprender u singuls elements pon ins retrair en la butia online (https://shop.sdbb.ch/de-  ;CH/mb1-1013-mb1-1013) dal CSCP.
