La vignetta per manaschis d’emprendissadi
Infurmaziuns e pussaivladads d’empustaziun per ils uffizis chantunals per la furmaziun professiunala
La vignetta per manaschis d’emprendissadi è vegnida introducida il 1997 en Svizra franzosa. Sin plaun naziunal è ella vegnida lantschada l’onn 2004.
La vignetta è ina renconuschientscha ed in engraziament als manaschis d’emprendissadi per lur engaschi en favur da la furmaziun professiunala. Ella è in bun instrument da marketing: Tgi che scolescha emprendistas ed emprendists po mussar quai a sia clientella ed als partenaris da fatschenta.
La vignetta radunda è disponibla en rumantsch, tudestg, talian, franzos, englais, en ina versiun bilingua franzos-tudestga ed en trais grondezzas (diameter da 3,5 cm, 14 cm u 20 cm).
Il Secretariat da stadi per furmaziun, retschertga ed innovaziun (SEFRI) finanziescha ed edescha la vignetta en collavuraziun cun il CSCP.
CO DUVRAR LAS VIGNETTAS
Ils manaschis d’emprendissadi pon duvrar la vignetta en diversas modas. Els pon tatgar ella p.ex. sin la porta d’entrada, la vaidrina, la chascha da brevs, la cassa, l’auto da la firma u dapertut là, nua che blera clientella la vesa. Numerus manaschis d’emprendissadi dovran la vignetta er en furma electronica sin lur stampats, sin la pagina-web u en la signatura dad e-mail.
