Las basas legalas
Las cundiziuns generalas da la furmaziun professiunala
La furmaziun professiunala en Svizra sa funda sin ina basa legala che garantescha la qualitad e las cundiziuns generalas da la furmaziun fundamentala professiunala. Qua vegnan explitgadas curtamain las basas legalas las pli impurtantas.
Sin plaun federal
La furmaziun professiunala è francada en la Constituziun federala. Quai dat a la Confederaziun il dretg da relaschar las prescripziuns correspundentas (art. 63 Cst.) . La lescha federala (LFPr ) e l'ordinaziun respectiva (OFPr) davart la furmaziun professiunala defineschan las basas legalas las pli impurtantas per la furmaziun professiunala.
Mintga furmaziun fundamentala professiunala è reglada en detagl en in'ordinaziun da furmaziun. Quella furma la basa la pli impurtanta per l'activitad da las instituziuns responsablas per la furmaziun.
La Glista da las professiuns (SEFRI) dat ina survista da tut las professiuns da la furmaziun fundamentala professiunala (AFP ed AFQ) e da la furmaziun professiunala superiura (examen professiunal, examen professiunal superiur) sco era dals plans d'instrucziun approvads, dals curs da furmaziun e dals curs supplementars ad in diplom che vegnan purschids actualmain ed èn reglads en la Lescha federala davart la furmaziun professiunala LFPr .
Il Dretg d'obligaziuns
La furmaziun professiunala è colliada cun il mund da lavur: cun il contract d'emprendissadi concludan la persuna che emprenda ed il manaschi d'emprendissadi in contract da lavur spezial. L'emprendista u l'emprendist è era lavuranta u lavurant, perquai valan per ella u el las disposiziuns legalas dal contract da lavur, resalvond las disposiziuns spezialas dal contract d'emprendissadi. Il contract d'emprendissadi è in contract individual da lavur ed è perquai reglà en il Dretg d'obligaziuns sut ils contracts da lavur spezials (art. 344 bis 346a DO) . Ulteriuras leschas relevantas per la furmaziun fundamentala professiunala èn la Lescha da lavur LL (https://www.fedlex.admin.ch/eli/cc/1972/604_612_536/de) , la Lescha davart l'egualitad da persunas cun impediments (LImp ) u la Lescha davart l'egualitad da dunna ed um (LEg ).
La lescha da lavur
Per las persunas che emprendan valan las disposiziuns dal dretg public per lavurantas e lavurants. Ellas pon per exempel recurrer a las disposiziuns da protecziun spezialas per giuvenils. A la Lescha da lavur (LL ) èn suttamess praticamain tut las branschas economicas e tut ils manaschis privats e publics.
- Factsheet 303: Public Employment Law and Collective Labour Law (In German) [PDF, 93.74 KB]
Sin plaun chantunal
Ils chantuns èn per gronda part responsabels per l'applicaziun da la legislaziun davart la furmaziun professiunala. Els surveglian las relaziuns d'emprendissadi, dattan permissiuns da furmaziun u retiran quellas ed approveschan ils singuls contracts d'emprendissadi.
Per quest'incumbensa d'execuziun dovri basas legalas chantunalas. La lescha federala è dentant adina superiura al dretg chantunal. L'applicaziun da las prescripziuns federalas variescha. La Confederaziun dat per exempel paucas directivas davart l'organisaziun e la finanziaziun da la procedura da qualificaziun; uschia pon quellas sa differenziar fermamain da chantun a chantun. Tut ils chantuns examineschan percunter ils medems champs da qualificaziun ch'èn definids detagliadamain en las ordinaziuns da furmaziun.
La part individuala – il contract d'emprendissadi
Cun il contract d'emprendissadi vegnan concretisadas las disposiziuns legalas. Las partidas dal contract d'emprendissadi, il manaschi d'emprendissadi e la persuna che emprenda s'obligheschan da resguardar las disposiziuns legalas en il rom da la furmaziun fundamentala professiunala. Sin la pagina da cuntegn "Il contract d'emprendissadi dad A fin Z" èn inditgadas tut las disposiziuns davart il contract d'emprendissadi.
