Daventar furmatur:a professiunal:a
Premissas e qualificaziuns necessarias
Furmatur:as professiunal:as dattan vinavant lur savida e passiun directamain a la proxima generaziun. Ellas ed els intermedieschan a las emprendistas ed als emprendists la pratica e la teoria ed als preparan uschia per lur futur professiunal. Furmatur:as professiunal:as sa distinguan tras lur cumpetenzas professiunalas e pedagogicas.
Las premissas professiunalas:
- attestat federal da qualificaziun en la professiun che Vus vulais scolar resp. ina qualificaziun cumparegliabla
- in'experientscha professiunala dad almain dus onns en la professiun che Vus vulais scolar
La qualificaziun pedagogica:
- certificat dal curs da 40 uras u in diplom renconuschì sin plaun federal per furmatur:as professiunal:as en manaschis d'emprendissadi (100 uras d'instrucziun)
Attenziun: Per tschertas professiuns determineschan las ordinaziuns da furmaziun ulteriuras premissas.
AVANTATGS D'ESSER FURMATUR:A
Scolar emprendistas ed emprendists è ina lavur che fa senn e che ha avantatgs per l'agen futur e per il futur da Vossa branscha. Cun intermediar Vossa savida e Vossas experientschas prestais Vus ina contribuziun impurtanta a la promoziun da forzas da lavur qualifitgadas e da la generaziun giuvna.
OBLIGAZIUNS SCO FURMATUR:A PROFESSIUNAL:A
Sco furmatur:a professiunal:a essas Vus responsab:la per il svilup professiunal e persunal da las emprendistas e dals emprendists. Quai vul dir che Vus planisais e realisais la scolaziun ed intermediais la savida pratica.
Survista dals curs per furmatur:as professiunal:as en manaschis d'emprendissadi
| furmaziun | curs | scolaziun |
|---|---|---|
| temp d'impunder | 40 uras da curs | 100 uras d'instrucziun |
| finiziun | senza procedura da qualificaziun | cun procedura da qualificaziun |
| cumprova | certificat da curs | diplom |
Il certificat emess d'ina organisaziun renconuschida per curs da furmatur:as professiunal:as è valaivel per vita duranta e renconuschì da tut ils chantuns.
