Il contract d’emprendissadi dad A-Z
Ils cuntegns, ils dretgs e las obligaziuns, l’annullaziun
Il contract d’emprendissadi è la basa da la relaziun d’emprendissadi. La cuntraprestaziun per la lavur da las emprendistas e dals emprendists n’è betg en emprima lingia la paja, mabain la furmaziun offerta dal manaschi. Il contract d’emprendissadi standardisà sin plaun naziunal vala per:
- tut las furmaziuns fundamentalas professiunalas da trais u quatter
onns cun attest federal da qualificaziun (AFQ) - tut las furmaziuns fundamentalas professiunalas da dus onns
cun attest federal professiunal (AFP)
Ils manaschis d’emprendissadi ston avair ina permissiun chantunala per la furmaziun per pudair concluder contracts d’emprendissadi. En cas da dumondas pon ins sa drizzar a l’Uffizi chantunal per la furmaziun professiunala: dumonda da permissiun
I dat differentas pussaivladads d’emplenir in contract d’emprendissadi:
| Pussaivladad | Descripziun | Adattà per: |
|---|---|---|
| Portal da l’Uffizi chantunal per la furmaziun professiunala | Soluziun digitala per emplenir ed inoltrar il contract d’emprendissadi en furma electronica (senza palpiri). | Manaschis d’emprendissadi domiciliads en in chantun cun in portal digital |
| Formular interactiv | Questa soluziun permetta da generar en in pass tants contracts d’emprendissadi sco quai ch’ins vul, sumegliant a las funcziuns da brevs en seria enconuschentas da las applicaziuns d’Office. | Manaschis d’emprendissadi che vulan administrar e generar a moda effizienta e survesaivla plirs contracts d’emprendissadi |
| Stampa en seria cun tabella d’Excel | Questa soluziun permetta da generar en in pass tants contracts d’emprendissadi sco quai ch’ins vul, sumegliant a las funcziuns da brevs en seria enconuschentas da las applicaziuns d’Office. | Manaschis d’emprendissadi che vulan administrar e generar a moda effizienta e survesaivla plirs contracts d’emprendissadi |
|
Program per contracts
| Il program permetta d’administrar contracts d’emprendissadi e rapports da furmaziun da pliras persunas ch’emprendan. El è disponibel tant per Windows sco era per Mac. In’installaziun è necessaria (dretgs d’administratur). | Manaschis d’emprendissadi che vulan administrar a moda centrala contracts d’emprendissadi e rapports da furmaziun da lur emprendistas ed emprendists |
| Contract stampà | En la butia dal CSPS pon ins empustar in set cun 10 contracts d’emprendissadi stampads. | Manaschis d’emprendissadi che vulan emplenir il contract d’emprendissadi sin palpiri |
LAS DIFFERENTAS PUSSAIVLADADS EN DETAGL
La basa giuridica
Il contract d’emprendissadi correspunda al contract individual da lavur (Dretg d’obligaziuns DO art. 344 fin 346a ), sa distingua dentant tras il fatg ch’el regla a medem temp era la furmaziun.
- Il contract d’emprendissadi sto esser avant maun en furma scritta per esser valaivel.
- Il contract d’emprendissadi vegn controllà ed approvà da l’autoritad chantunala cumpetenta.
Il contract d’emprendissadi sto star a disposiziun avant u il pli tard a l’entschatta d’ina furmaziun fundamentala professiunala.
Elements reglads en il contract d’emprendissadi
Tip e durada da la furmaziun fundamentala professiunala
Temp da prova
Temp da lavur
Indemnisaziun per emprendistas ed emprendists
Vacanzas
SUTTASCRIPZIUN DAL CONTRACT D’EMPRENDISSADI
Il contract d’emprendissadi vegn concludì tranter il manaschi d’emprendissadi e la persuna ch’emprenda. Sch’il contract vegn suttascrit avant il 18avel anniversari da la persunas ch’emprenda, ston las persunas cun represchentanza legala (per il solit ils geniturs) era dar lur consentiment en scrit.
