La furmaziun professiunala en Svizra
Il sistem e l'impurtanza da la furmaziun fundamentala professiunala
Il sistem da furmaziun svizzer, dal qual fa part era la furmaziun professiunala, sa distingua tras in'auta permeabladad. Suenter la furmaziun fundamentala professiunala èsi pussaivel d'absolver ina furmaziun professiunala superiura, da frequentar differentas furmaziuns supplementaras orientadas a la professiun e da far ina midada d'activitad durant la vita professiunala. La maturitad professiunala avra era la via a las scolas autas spezialisadas e sur ina passarella er a las universitads svizras. La furmaziun fundamentala professiunala è damai ina basa solida per la carriera professiunala e per l'emprender per vita duranta.
La furmaziun professiunala cuvra in vast spectrum da pussaivladads da scolaziun. Tut en tut datti var 240 furmaziuns fundamentalas professiunalas ch'èn regladas sin plaun federal. Ellas duran dus, trais u quatter onns ed èn concepidas tenor las abilitads e cumpetenzas differentas da las emprendistas e dals emprendists.
La furmaziun fundamentala professiunala vegn absolvida suenter il temp da scola obligatoric. Ella intermediescha las enconuschientschas, abilitads e tenutas ch'èn necessarias per exercitar ina professiun. La savida intermediada a las emprendistas ed als emprendists en la furmaziun fundamentala professiunala sa basa sin trais nivels: la pratica en il manaschi, ils curs intermanaschials e l'instrucziun da roms da savida generala e da savida professiunala.
