Publitgar la plazza d'emprendissadi
Recumandaziuns per in inserat da plazza reussì
Cun in profil d'exigenzas elavurà bain ed ina publicaziun efficazia da Vossas plazzas d'emprendissadi augmentais Vus la schanza da chattar candidat:as adatta:das per Voss manaschi. Cumenzai a planisar ad uras per garantir in process speditiv e senza incaps.
Definir il profil d'exigenzas
Il profil d'exigenzas è il crap da fundament per tschertgar l'emprendista u l'emprendist ideal:a. El determinescha tge abilitads, enconuschientschas e caracteristicas persunalas ch'i dovra per la scolaziun. Resguardai ils suandants puncts:
- Analisar l'activitad: Identifitgai las cumpetenzas-clav ch'èn necessarias per la professiun.
- Definir las exigenzas: Determinai las abilitads professiunalas e persunalas che l'emprendist:a duess avair.
- Scriver a moda clera e precisa: Formulai las exigenzas a moda clera e bain chapibla.
Publitgar las plazzas d'emprendissadi
Suenter avair creà il profil d'exigenzas suonda la publicaziun da la plazza d'emprendissadi. Il process cumpiglia ils suandants pass:
- Dumandar la permissiun per la furmaziun: Avant che publitgar las plazzas d'emprendissadi duvrais Vus ina permissiun per la furmaziun da la professiun correspundenta .
- S'annunziar en il portal dals manaschis d'emprendissadi: As annunziai en il portal da Voss chantun per registrar e modifitgar las plazzas d'emprendissadi.
- Registrar la plazza d'emprendissadi: Inditgai en il portal tut las infurmaziuns relevantas davart la plazza d'emprendissadi. Quai cumpiglia il profil d'exigenzas, il cumenzament da l'emprendissadi ed ulteriurs detagls impurtants.
- Publitgar la plazza d'emprendissadi: Suenter avair registrà la plazza d'emprendissadi è quella visibla sin la pagina-web chantunala da las plazzas d'emprendissadi ed accessibla per las candidatas ed ils candidats potenzials.
ILS TERMINS
Las plazzas d'emprendissadi pon vegnir registradas da tut temp.
Las plazzas d'emprendissadi che cumenzan l'avust vegnan publitgadas a partir da l'avust (CH-de) resp. dal settember (CH-fr) da l'onn precedent sin las paginas chantunalas da las plazzas d'emprendissadi.
Impurtant: La glista da las plazzas d'emprendissadi vegn actualisada cuntinuadamain e sa referescha a l'onn suenter la finiziun dal 9avel onn da scola. Quai facilitescha a las giuvenilas ed als giuvenils da chattar plazzas d'emprendissadi adattadas e da s'annunziar a temp.
