Planisar e realisar in fufragnadi

A partir da l'otgavel onn da scola èsi raschunaivel da rimnar experientschas da lavur praticas en il rom d'in fufragnadi. Uschia pon las giuvenilas ed ils giuvenils examinar, sche lur interess e lur premissas correspundan a lur professiun dals siemis. A medem temp è il fufragnadi per ils manaschis ina part da la procedura da selecziun che gida d'eruir, schebain la candidata u il candidat va a prà cun il manaschi.

Las cundiziuns da basa legalas e las assicuranzas 

Il fufragnadi è suttamess a cundiziuns da basa legalas specificas. Igl è impurtant che tant il manaschi sco era la persuna che fa il fufragnadi sajan conscients da quellas. Per l'assicuranza d'accidents è il manaschi responsabel e per fufragnadis pli lungs èsi da resguardar ulteriuras prescripziuns da l'assicuranza sociala.  

Ultra da quai èn reglads legalmain er ils temps da lavur da las persunas che fan in fufragnadi. Tenor la lescha da lavur pon giuvenilas e giuvenils obligads dad ir a scola absolver in fufragnadi a partir da 13 onns. In'occupaziun è lubida mo ils lavurdis ed è limitada a maximalmain 8 uras al di tranter las 6.00 e las 18.00. L'engaschament respectiv na dastga betg durar pli ditg che duas emnas. 

Ils chantuns pon pretender ina lubientscha per l'engaschament resp. prescriver in'obligaziun d'annunzia per ils manaschis. Perquai èsi raschunaivel da s'infurmar tar l'uffizi chantunal cumpetent (p.ex. inspecturat da lavur) avant che porscher in fufragnadi.