La furmaziun fundamentala professiunala
Attestat federal da furmaziun professiunala (AFP), attestat federal da qualificaziun (AFQ) e maturitad professiunala federala (MP)
La furmaziun fundamentala professiunala intermediescha qualificaziuns ed abilitads ch'èn necessarias per la vita professiunala. Ella succeda per regla en in manaschi d'emprendissadi, en ina scola professiunala spezialisada ed en curs intermanaschials. La furmaziun fundamentala professiunala è reglada en in'ordinaziun da furmaziun ed en in plan da furmaziun e vegn terminada cun ina procedura da qualificaziun. Ella maina ad in diplom professiunal renconuschì sin plaun federal che dat access a furmaziuns professiunalas superiuras.
AFP
La furmaziun fundamentala professiunala da dus onns sa drizza ad emprendist:as cun talents pratics, ma prestaziuns da scola pli flaivlas. Ella maina ad in attestat federal da furmaziun professiunala (AFP) e po vegnir prolungada u scursanida tenor basegn. Suenter la furmaziun fundamentala professiunala da dus onns èsi pussaivel d'absolver ina furmaziun fundamentala professiunala da trais u quatter onns. Tut tenor il champ professiunal po questa segunda furmaziun vegnir terminada en furma scursanida
AFQ
La furmaziun fundamentala professiunala da trais u quatter onns vegn terminada cun in attestat federal da qualificaziun (AFQ). Quel dat access a la furmaziun professiunala superiura. En cas da bunas prestaziuns da scola po la furmaziun fundamentala vegnir cumplettada cun la maturitad professiunala. La furmaziun fundamentala da trais u quatter onns po vegnir prolungada u scursanida tenor basegn.
MP
La maturitad professiunala cumplettescha la furmaziun fundamentala professiunala cun attestat federal da qualificaziun cun ina furmaziun generala approfundada; ella vegn terminada cun l'examen da maturitad professiunala. La maturitad professiunala po vegnir absolvida durant la furmaziun fundamentala (MP1) u suenter quella (MP2).
Possessur:as d'in attestat federal da maturitad professiunala pon studegiar en ina scola auta spezialisada en ina direcziun da studi parenta cun lur professiun, e quai senza far l'emprim in examen. Cun in examen cumplementar (passarella) stattan avertas ad ellas ed ad els era las scolas autas universitaras.
Furmaziun fundamentala en scola FFS
En intginas professiuns vegn la furmaziun fundamentala professiunala absolvida en in'instituziun da scolaziun a temp cumplain. Quai po esser ina purschida publica sco in lavuratori d'emprendissadi, ina scola media commerziala (SMC) u ina scola media d'informatica (SMI).
Tgi che absolva ina purschida da scolaziun a temp cumplain (cun excepziun dals lavuratoris d'emprendissadi) frequenta durant la furmaziun fundamentala professiunala in praticum che intermediescha las abilitads praticas. Era las furmaziuns fundamentalas organisadas da la scola mainan ad in diplom federal.
Per realisar la FFS en ils chantuns ha la CSFP elavurà differentas recumandaziuns per la professiun da commerziant:a AFQ .
