Persunas creschidas pon absolver ina furmaziun fundamentala professiunala cumplaina da dus, trais u quatter onns (AFP u AFQ cun/senza maturitad professiunala). Per quest intent ston ellas chattar in manaschi d’emprendissadi e concluder in contract d’emprendissadi. Ellas frequentan l’instrucziun regulara a las scolas professiunalas e ston passar cun success la procedura da qualificaziun.
 
Per l’approvaziun dals contracts d’emprendissadi èn responsabels ils uffizis per la furmaziun professiunala.

Furmaziun fundamentala professiunala scursanida  

En cunvegna cun las parts contrahentas po l’autoritad chantunala scursanir en cas singuls la furmaziun fundamentala professiunala. La premissa per ina furmaziun scursanida è che l’emprendista u l’emprendist haja gia enconuschientschas specificas da la professiun u haja absolvì ina furmaziun fundamentala en in’autra professiun.
 
Tenor l’art. 18 OFPr  ha la scola professiunala spezialisada il dretg da far ina dumonda da scursanir la furmaziun fundamentala professiunala. Per regla vegn la furmaziun scursanida per in fin dus onns. 
 
Era per ina furmaziun fundamentala professiunala èsi necessari da concluder in contract d’emprendissadi.  
 
La furmaziun fundamentala professiunala scursanida vegn terminada cun la procedura da qualificaziun usitada.  

Furmaziun fundamentala professiunala prolungada  

Per persunas cun basegns spezials po la furmaziun fundamentala professiunala vegnir prolungada a moda adequata. Ellas survegnan uschia dapli temp per s’acquistar las cumpetenzas d’agir definidas en l’ordinaziun da furmaziun. Las partidas contrahentas inoltreschan a l’autoritad chantunala respectiva, ensemen cun l’approvaziun dal contract d’emprendissadi, la dumonda da prolungar la durada da la furmaziun fundamentala professiunala. Il Chantun approvescha la dumonda suenter avair consultà la scola professiunala spezialisada. Ina furmaziun fundamentala professiunala po vegnir realisada tant per persunas en plazzas cumplainas sco era parzialas. Sch’ins planisescha la scolaziun organisada dal manaschi sur in temp pli lung cun ina plazza a temp parzial, sto la durada da l’emprendissadi vegnir prolungada. Per organisar quai dovri ina stretga collavuraziun tranter ils trais lieus d’emprender.