Diplom professiunal per persunas creschidas
Opziuns, pussaivladads da rescolaziun e process
Il sistem da furmaziun svizzer porscha differentas pussaivladads da far in diplom professiunal renconuschì sin plaun federal. Oriundamain è la furmaziun fundamentala professiunala vegnida concepida sco purschida da furmaziun per giuvenils. Ella sa distingua tras furmaziuns bain structuradas, scolaziuns a temp cumplain, disposiziuns per la protecziun da la giuventetgna e numerusas purschidas da sustegn e da cussegliaziun adattadas per ina gruppa en mira giuvna.
Ma era persunas creschidas pon far sin differentas vias in diplom da furmaziun professiunala (AFP u AFQ cun/senza MP). A basa da la Lescha davart la furmaziun professiunala èsi pussaivel da tegnair quint da cumpetenzas gia acquistadas e da scursanir las furmaziuns correspundentamain. Ultra da quai permetta il rom legal da sviluppar ulteriuras purschidas da furmaziun specificas per persunas creschidas.
Da princip consista ina furmaziun fundamentala professiunala adina da trais elements: da la furmaziun, da l'admissiun ad ina procedura da qualificaziun e da la procedura da qualificaziun. Per pudair absolver ina procedura da qualificaziun dovran las candidatas ed ils candidats in'admissiun correspundenta. Ils criteris d'admissiun specifics èn determinads en l'ordinaziun da furmaziun correspundenta. Cun frequentar ina furmaziun en in manaschi u en ina scola vegnan da princip ademplidas las premissas d'ina admissiun. Ina candidata u in candidat po dentant far ina dumonda d'admissiun er ordaifer ina purschida da furmaziun reglada cun cumprovar l'experientscha professiunala necessaria e render vardaivel ch'ella u ch'el ademplescha las pretensiuns da la procedura da qualificaziun correspundenta.
Ils chapitels sutvart descrivan differentas vias che permettan a persunas creschidas da far in diplom professiunal (AFP u AFQ cun/senza MP).
BLERAS VIAS MAINAN A LA MEDEMA FINAMIRA
Furmas per renconuscher prestaziuns da furmaziun
Admissiun ad ina furmaziun
Renconuschientscha da prestaziuns da furmaziun
Admissiun ad ina procedura da qualificaziun
Renconuschientscha da prestaziuns da furmaziun per ina procedura da qualificaziun
MUSSAVIA: RENCONUSCHIENTSCHA DA PRESTAZIUNS DA FURMAZIUN
Il mussavia "Anrechnung von Bildungsleistungen in der beruflichen Grundbildung" dal SEFRI descriva il process per tegnair quint da prestaziuns da furmaziun e cuntegna recumandaziuns als chantuns ed a las instituziuns purtadras.
Il mussavia ed infurmaziuns supplementaras davart la renconuschientscha da prestaziuns da furmaziun chattais Vus sin la pagina-web dal SEFRI .
RENCONUSCHIENTSCHA DA DIPLOMS DA L'EXTERIUR
Persunas creschidas che han acquistà a l'exteriur in diplom cumparegliabel cun ina furmaziun fundamentala professiunala, han en Svizra la pussaivladad d'inoltrar ina dumonda al SEFRI per renconuscher il diplom da l'exteriur (equivalenza) u confermar il nivel da quel.
La procedura da renconuschientscha sa differenziescha tut tenor, sche la professiun è reglamentada en Svizra u betg. Ina professiun vala sco reglamentada, sche l'exercizi da l'activitad professiunala en Svizra pretenda qualificaziuns professiunalas specificas a basa da prescripziuns legalas u administrativas.
Infurmaziuns pli detagliadas èn disponiblas sin la pagina-web dal SEFRI sut www.sbfi.admin.ch/diploma .
CUMPETENZAS
Kantone und Organisationen der Arbeitswelt (OdA) sind für den Aufbau, die Information und die Zulassung zu diesen Wegen zuständig.
Für Personen, die ihren Berufsabschluss nachholen wollen, bietet das Portal berufsberatung.ch einen Überblick über die verschiedenen Angebote.
Ils chantuns e differentas organisaziuns dal mund da lavur èn cumpetents per la concepziun, l'infurmaziun e l'admissiun correspundenta.
Per persunas che vulan acquistar posteriuramain in diplom professiunal porscha il portal berufsberatung.ch ina survista da las differentas purschidas.
