Ils chantuns èn responsabels per l'organisaziun e la surveglianza da la furmaziun da scola. Ils purtaders da las scolas professiunalas pon variar tut tenor chantun e tradiziun:

• chantun
• vischnancas e corporaziuns da vischnancas
• purtaders privats

Las scolas professiunalas han in'incumbensa da furmaziun independenta. En l'instrucziun davart la professiun vegn intermediada la part teoretica da la professiun. En l'instrucziun da furmaziun generala vegnan tractads cuntegns che promovan il svilup da la persunalitad e la furmaziun da l'atgna opiniun.

En collavuraziun cun las organisaziuns dal mund da lavur (OdML) èn ils chantuns responsabels per la realisaziun dals curs ordaifer il manaschi. Ils cuntegns dals curs èn determinads en ils decrets da furmaziun respectivs (ordinaziun davart la furmaziun e plan da furmaziun).

Per la realisaziun da las proceduras da qualificaziun èn ils chantuns responsabels. Quels enconuschan differentas structuras d'organisaziun. Per regla vegnan installadas cumissiuns d'examen ch'èn responsablas per singulas professiuns u gruppas da professiun u per tut las furmaziuns professiunalas da basa. Il chantun po era delegar la realisaziun da las proceduras da qualificaziun en il manaschi ad in'associaziun resp. ad in center da cumpetenza.

Tenor l'art. 35 al. 1 OFPr nominescha l’autoritad chantunala expertas ed experts per realisar ils examens finals da la furmaziun professiunala da basa. Las organisaziuns cumpetentas dal mund da lavur han il dretg da far propostas.

La qualificaziun che pertutga la pedagogia per la furmaziun professiunala per persunas responsablas per la furmaziun professiunala en manaschis d'emprendissadi cumpiglia 100 uras d'emprender e vegn concludida cun in diplom federal. Sco alternativa èsi era pussaivel d'absolver il curs per persunas responsablas per la furmaziun professiunala en manaschis d'emprendissadi che cumpiglia 40 uras da curs. Quest curs vegn realisà dals chantuns u en collavuraziun cun las organisaziuns dal mund da lavur. Las participantas ed ils participants survegnan in diplom chantunal renconuschì da la Confederaziun.

La furmaziun da las persunas responsablas per la furmaziun professiunala è definida en il plan d'instrucziun per persunas responsablas per la furmaziun.

 

Las autoritads chantunalas, per regla èn quai ils uffizis per la furmaziun professiunala, han la responsabladad da survegliar la furmaziun da basa en il manaschi ed en la scola professiunala. La surveglianza cumpiglia en spezial la cussegliaziun e l'accumpagnament da las partidas dal contract d'emprendissadi e la coordinaziun da las incumbensas da tut las partidas cumpigliadas en la furmaziun professiunala.

Plinavant controllescha la surveglianza en la part dal manaschi da la furmaziun professiunala 

• che las disposiziuns legalas en il contract d'emprendissadi vegnian observadas
• che omaduas parts contrahentas observian il contract d'emprendissadi
• la qualitad da la furmaziun en la pratica professiunala (incl. curs ordaifer il manaschi ed en auters lieus cumparegliabels)

ils examens ed autras proceduras da qualificaziun 

Las incumbensas principalas da la surveglianza da scola èn

• da garantir la qualitad da la furmaziun da scola
• da cussegliar e sustegnair las manadras ed ils manaders da scola e las cumissiuns da scola en dumondas pedagogicas, psicologicas, d'economia da manaschi e legalas

Ils uffizis per la furmaziun professiunala èn centers da cumpetenza per dumondas areguard la furmaziun professiunala. Els èn partenaris per tut las acturas ed ils acturs da la furmaziun professiunala, sco la Confederaziun, ils departaments da furmaziun chantunals, associaziuns, l'economia sco era per ulteriuras persunas involvidas en la furmaziun professiunala da basa (persunas responsablas per la furmaziun professiunala, scolast:as, emprendist:as, geniturs, euv.). 

Intermediar e cussegliar èn las incumbensas principalas da l'Uffizi per la furmaziun professiunala. El stat a disposiziun a las partidas dal contract d'emprendissadi ed a terzas partidas e suttastat al secret d'uffizi. En cas da dispita po el intermediar sco instanza neutrala tranter las partidas e sch'il contract vegn schlià, po el gidar a tschertgar ina nova soluziun. In'incumbensa impurtanta è er il sustegn da manaschis che scoleschan (vulan scolar) emprendist:as.

Dasper las incumbensas tradiziunalas da garantir in decurs senza incaps da la furmaziun professiunala, surpiglian ils uffizis per la furmaziun professiunala chantunals er incumbensas per sviluppar vinavant la furmaziun professiunala. 

Las organisaziuns dal mund da lavur (OdML) fan part da las cumissiuns per il svilup professiunal e la qualitad. Ellas èn responsablas per il cuntegn da l'ordinaziun da furmaziun. Ellas procuran plinavant ch'ils cuntegns e la qualitad da la furmaziun da basa vegnan adattadas periodicamain a las pretensiuns dal mund da lavur.  

Las cumissiuns per il svilup professiunal e la qualitad sa cumponan da represchentant:as da las organisaziuns dal mund da lavur (OdML) incl. la represchentanza da las persunas d'instrucziun spezialisadas, la Confederaziun (Secretariat da stadi per furmaziun, retschertga ed innovaziun SEFRI) e dals chantuns (Conferenza svizra dals uffizis da la furmaziun professiunala CSFP). La funcziun, las incumbensas, las cumpetenzas e las modas d'agir da las cumissiuns per il svilup professiunal e la qualitad èn descrittas detagliadamain en «l'agid d'orientaziun per las cumissiuns svizras per il svilup professiunal e la qualitad». 

Il plan da furmaziun da la professiun fa part da l'ordinaziun da furmaziun. El è il concept pedagogic per la furmaziun professiunala da basa ed è in instrument per promover la qualitad en la furmaziun. El vegn decretà da las OdML responsablas, approvà dal SEFRI ed è liant.

En la furmaziun professiunala da basa èn las federaziuns professiunalas en collavuraziun cun ils chantuns responsabels per realisar ils curs ordaifer il manaschi per intermediar las cumpetenzas fundamentalas professiunalas. El:las elavuran er ils reglaments necessaris. 

Tenor la lescha federala èn ils chantuns obligads da procurar sin lur territori per l'instrucziun en las scolas professiunalas spezialisadas. Els pon delegar questa incumbensa a las vischnancas u a las federaziuns professiunalas ed als manaschis. 

Bleras scolas professiunalas spezialisadas èn integradas en las structuras publicas. In exempel per in purtader privat èn las scolas professiunalas spezialisadas commerzialas che vegnan per part purtadas da la Societad svizra d'emploiads da commerzi. 

En il rom da proceduras da qualificaziun pon la Confederaziun u ils chantuns incumbensar las federaziuns professiunalas da realisar ils examens finals. La realisaziun dals examens finals pretenda in grond dumber d'expertas e d'experts da l'economia che ston avair tant enconuschientschas professiunalas fundadas ed actualas sco era la cumpetenza da giuditgar necessaria. 

Las federaziuns professiunalas realiseschan tenor ils agens reglaments ils examens renconuschids da la Confederaziun. Part da quai fa l'examen professiunal cun certificat professiunal federal, l'examen professiunal superiur cun diplom federal ed ils examens da diplom da las scolas spezialisadas superiuras. La survigilanza dals examens e l'approvaziun dals reglaments è l'incumbensa da la Confederaziun.

Il perfecziunament orientà a la professiun duai gidar persunas qualifitgadas d'adattar lur enconuschientschas professiunalas als svilups tecnics, economics e socials e da schlargiar lur furmaziun generala.